Article 6

بوگونلر هريئرده سؤز سودان گئدير
دنيز چابالايير، چيخيب جان گئدير
اورمونون گؤزوندن ياش نه؟ قان گئدير!
آغالار اوزونو توتوب يان گئدير
نييه سين سوروشما، ندنين سورما
قولاقلار توتولوب اؤزونو يورما!
اه يله شيب مجليسده ملّت آدينا
او آنجاق جيبينين يئتر دادينا!
رأي واختي دوشه جك ملّت يادينا!
گؤلون قوروماغي دئييل زادينا..
بوراخ سن ده بابام، چوخ اوستون وورما
قولاقلار توتولوب اؤزونو يورما!
آذربايجان جاني چيخيردا چيخسين
اؤلوم بوغازيني سيخيردا سيخسين
بو اولاي ائويني ييخيردا ييخسين
بودجاني عزيزلر تيخيردا تيخسين!
سن ده ناراحاتسان اورمودا دورما
قولاقلار توتولوب اؤزونو يورما
مسجيدين ائشيگي ايچيندن واجب!
يايدا دووشان توتماق بيچيندن واجب!
چاريغي قوروماق قيچيندن واجب!
ميز بئله دريانين اوچوندن واجب!!!
حمد اوخو سن ده يئه حالوايلا خورما!
قولاقلار توتولوب اؤزونو يورما!
اورميه عزيزدير، ائل حؤرمت ائيلر
آييلار يوخودان بير غيرت ائيلر!
دوزلانميش ياراسين طبابت ائيلر
«عليار»دا بير بارداق سو سووقت ائيلر!
دنيز يئنه دولار دوشرده فورما!
قولاقلار توتولوب اؤزونو يورما